“Qarabağ”ın ev oyununda son 10 mövsümün rekordu

Misli Premyer Liqasında son 10 mövsümün tamaşaçı rekordu qeydə alınıb. Bu, komandamızın XXVIII turda “Sabah”la keçirdiyi ev matçına (0:1) təsadüf edib.

Tofiq Bəhramov adına Respublika stadionunda keçirilən qarşılaşmanı 17 min 338 seyrçi izləyib. Bunadək mövsümün əvvəlki rekordu da “Qarabağ”la “Sabah”ın eyni arenadakı görüşündə olub. XXII turun 3:3 hesabı ilə bitən qarşılaşmasını 10 min 361 tamaşaçı seyr edib.

XXVIII turun oyunundakı nəticə son 10 mövsüm üçün ən yüksək göstəricidir. Daha çox tamaşaçının izlədiyi sonuncu görüş 2015/16 mövsümündə baş tutub. 2016-cı il fevralın 14-də Gəncə şəhər stadionunda keçirilən “Kəpəz” – “Qarabağ” oyununa 20 min 400 nəfər tamaşa edib.