“Qarabağ”ın yeni fan-klubu yaradıldı (çempion, 15.05.2006)

”Qarabağ” klubu daim yenilikləri ilə diqqət çəkməyi bacarıb. Türk iş adamlarının rəhbərlik etdiyi Ağdam təmsiliçisi həm də türkiyəlilərin bu kluba azarkeşlik etməsi ilə seçilir. Yaxın günlərdə isə türkiyəli tələbələr birləşərək “Qarabağ”ın yeni fan-klubunu yaradıblar. Bu kluba Uğur Aydın başçılıq edir. Dünən “Qarabağ” - “MKT-Araz” qarşılaşması zamanı fan-klubun səsi oyun boyu kəsilmədi. Biz oyundan sonra Uğur bəylə danışdıq: “Biz Azərbaycanda təhsil alan türkiyəli gənclər birləşərək “Qarabağ”a azarkeşlik etməyi qərar aldıq. Burada əsas məqsədlərdən biri həftəsonunu səmərəli keçirməkdir. Biz komandaya çətin anlarda dayaq olmağa çalışacağıq. Buna müəyyən mənada nail də olduq. “MKT-Araz”la matçda komandamız yenik duruma düşməsinə baxmayaraq, bizim dəstəyimiz sayəsində qalib gəlməyi bacardı. Ölkə kubokunun final matçına biz 400 nəfərlə yollanmağı planlaşdırıq. Gələcəkdə isə daha böyük planlarımız var”.