"QƏBƏLƏ" - "QARABAĞ"... 1:2

ƏZMKAR, LAYİQLİ QƏLƏBƏ ...

Oyuna  "Qarabağ" aktiv başladı. Bunun nəticəsi idi ki, artıq qarşılaşmanın 3-cü dəqiqəsində "Qarabağ" ilk real qol şansını əldə etdi. Lakin Muradın asmasından sonra Nidalın başla zərbəsində dəqiqlik çatışmadı. Buna cavab olaraq 4-cü dəqiqədə Kərimov qardaşlarının dueli baş tutdu. Lakin bu mübarizədən qapıçımız Sahil qalib ayrıldı. Bu hücumlardan sonra oyun daha çox meydanın mərkəzində davam etdi. 36-cı dəqiqəyədək. 36-cı dəqiqə Artim-Murad-Eminin  üçlü kombinasiyası məntiqli sonluqla başa çatdı. Emin topu tora qovuşdurdu və bu qolu bir gün öncə doğum günü olan qızına hədiyyə etdi. İlk hissənin sonunda Emin bir daha fərqlənə bilərdi. Rəqib qapıçı ilə təkbətək qalsa da Cahangir Həsənzadə bu mübarizədən qalib ayrıldı.
Oyunun ikinci hissəsinə məğlub durumda olan ev sahibləri hücumlarla  başladı. Lakin müdafiə xəttimizin sayıqlığı və qapıçımızın səhvsiz oyunu nəticəsində rəqib qapımıza yol tapa bilmirdi. Bu vəziyyət 80-ci dəqiqəyədək davam etdi. 80-ci dəqiqədə Kərimov qardaşları yenidən üz-üzə gəldilər. Ancaq bu dəfə Kənan Kərimov çərçivəni dəqiq nişan aldı. Hesab 1:1...
Qarşılaşmada bərabərlik bərpa olunandan sonra baş məşqçimiz dəyişikliyə əl atdı və dəyişiklik öz bəhrəsini verdi. Meydana buraxılan iki hücumçu missiyalarının öhdəsindən layiqincə gəldilər. İlk olaraq Ramazanov qapıçı ilə təkbətək qalsa da zərbəsində dəqiqlik çatışmadı. 1 dəqiqə sonra yəni 90-cı dəqiqədə Vaqif rəqib müdafiəsindən məharətlə sıyrılaraq oyunda son nöqtəni qoya bildi. 2:1... Oyun elə bu hesabla da başa çatdı.