Qurban Qurbanov: “Azarkeşlər üçün baxımlı oyun olacaq”

Çempionlar Liqasının II təsnifat mərhələsinin “Qarabağ” – “Linkoln” (Cəbəllütariq) oyunundan əvvəl komandamızın baş məşqçisi Qurban Qurbanovun mətbuat konfransı keçirilib. Təcrübəli mütəxəssis matç barədə fikirlərini bildirib:

“Bu mövsüm öz doğma stadionumuzda, doğma Bakımızda ilk oyunumuzu keçirəcəyik. Matça pis hazırlaşmadıq, rəqibi daha yaxından tanıdıq. İlk görüşdə qalib gəlməyimizə baxmayaraq, bu komandanın çox bacarıqla müdafiə olunmaq keyfiyyətləri var. Oyuna baxmışıq, analiz etmişik. Azarkeşlər üçün baxımlı oyun göstərmək istəyirik. Matçın dəyərinin bizim üçün böyük olduğunu bilirik. Qalib gəlsək, minimum Konfrans Liqasının əsas mərhələsini təmin edəcəyik. Buna görə çox ciddi hazırlaşmışıq”.

Baş məşqçi oyuna hazırlığı da dəyərləndirib: “Futbolçuların fiziki hazırlığı pis deyil. Düşünürəm ki, azarkeşlər üçün baxımlı oyun olacaq. Bu dəfə vaxtımız çox olduğu üçün fərqli hazırlaşa bildik. Komandada bir az psixoloji rahatlıq oldu. Bunu futbolçularda da gördüm. Həmişə çalışmışıq ki, əlimizdə olandan maksimum istifadə edək. Problem rəqibin bizə edəcəyi sürpriz olub. Başqa çətinlik görməmişəm. Musa Qurbanlı əməliyyat olunub. Digər futbolçular sağlamdır”.

Qurbanov mümkün transferlərə də toxunub: “Əlimizdə olan heyətlə bunlara hazır olmalıyıq. Məşqçi kimi istəyərəm ki, heyətə minimum 2 futbolçu qataq. Mövsüm ərzində zədələr, vərəqələr olur. Hər üç turnirdə yaxşı nəticə üçün mübarizə aparacağıq. Transferlərlə bağlı işlər də gedir. Orta xəttə və hücuma minimum bir oyunçu istəyirəm. Düşündüyümüzdən yaxşı variant yaransa, mövqeyindən asılı olmayaraq, transfer etməyə hazırıq. Həmişə heyəti qorumaq istəmişik”.

Baş məşqçi qapıçı mövqeyi barədə də danışıb: “Qapı çox vacib mövqedir. Ola bilər ki, hansısa yaxşı qapıçının başqa klubda oyuna alınmır. Şahrudin Məhəmmədəliyevin ümumi durumuna gəlincə, tam hazır olmağı üçün vaxt lazımdır. Hamımızın tanıdığı, münasibəti olduğu qolkiperdir. Buna görə də adaptasiyaya, vaxta ehtiyacı yoxdur. Biz hazırda qapıçı axtarışındayıq. İki gün əvvəl bir qolkiper almağa yaxın idik, sonda keçid baş tutmadı. Amma daha bir qapıçı götürmək istəyirik”.

Təcrübəli mütəxəssis komandanın hədəfi və transferlərlə bağlı çətinlik barədə fikirlərini bildirib: “Minimum hədəfimiz Konfrans Liqasının əsas mərhələsinə düşməkdir. Maksimum isə eyni nəticəni Çempionlar Liqasında göstərməkdir. Orada alınmasa, bunu Avropa Liqasında etməyə çalışacağıq. Ümumilikdə həmişə hədəfimiz maksimum olub. Transfer etmək get-gedə çox çətinləşir. Həmişə çalışmışıq yanlış transfer etməyək. Amma bu da mümkünsüzdür. Avropanın böyük klubları da transferlər 30 faiz uğurlu alınanda uduş, 50 faizi isə fantastik hesab edirlər. Biz axtarışdayıq, çox oyunçularla danışıqlarımız oldu. Hazırda da bir neçəsi ilə müzakirələr gedir. Minimum 1-2 oyunçu istəyirik”.