Qurban Qurbanov: “Bu, qarşıdakı görüşlərdə bizə çox vacibdir”

Çempionlar Liqasının II təsnifat mərhələsinin “Qarabağ” – “Linkoln” oyunundan (5:0) sonra komandamızın baş məşqçisi Qurban Qurbanovun mətbuat konfransı keçirilib. Təcrübəli mütəxəssis matç barədə fikirlərini açıqlayıb:

“Olimpiya çempionumuz Hidayət Heydərovu təbrik edirəm. Onun qarşılaşmalarına baxırdıq. Həqiqətən də zövq aldıq ki, belə idmançımız var. Olimpiadada olan bütün idmançılarımıza uğurlar arzulayıram. Futbolçu və ya digər növdəki idmançı üçün bu zirvədə olmaq böyük bir arzudur. Onların orda olması digərləri üçün də motivasiyadır. Hidayətə uğurlar arzulayıram, ailəsinə belə bir övlad böyütdükləri üçün təşəkkür edirəm. Komandamızı təbrik edirəm. Qalibiyyət, çox səliqəli və intizamlı oyun üçün futbolçulara təşəkkürümü bildirirəm. Üstünlük bizim tərəfimizdə olsa da, oyun intizamını sonadək qorudular. Bu, qarşıdakı görüşlərdə bizə çox vacibdir. Azarkeşlərimizə təşəkkür edirəm. Bu qədər azarkeşin olması futbolçulara motivasiya verdi”.

Baş məşqçi III təsnifat mərhələsindəki mümkün rəqiblər barədə də danışıb: “Lüdoqorets”lə Minsk “Dinamo”sunun oyununa baxmışam. Hansının bizə rəqib olması barədə düşünməmişəm. Belə fikrim olmayıb. Növbəti mərhələdəki rəqibin matçlarına baxmıram, öz oyunumuzu düşünürəm. Amma bu dəfə baxdım. Çünki hər bir halda bizə düşə bilərdi. Bu komandalar haqqında bir az məlumat topladım. Hərəsinin öz özəlliyi var. “Lüdoqorets” 11-12 il əvvəl də qrup mərhələsində oynayıb. Hiss olunur ki, yaxşı komanda olmaqla bərabər təcrübələri də var. Xüsusilə də Avropa təcrübəsinə malikdirlər. “Dinamo” aqressiv və aktivdir, gənc futbolçuları var, çox istəklidirlər”.