Qurban Qurbanov: “Çox vacib qələbə idi”  

Misli Premyer Liqasının XII turunun “Qarabağ” – “Kəpəz” oyunundan (7:1) sonra komandamızın baş məşqçisi Qurban Qurbanovun mətbuat konfransı keçirilib. Təcrübəli mütəxəssis matç barədə fikirlərini açıqlayıb:

“Futbolçularımı təbrik edirəm. Çox vacib qələbə idi. Bəzi fikirlərimiz var idi. Meydanda bunlardan istifadə etməyi çox istəyirdik. Çox olmasa da, alınan epizodlar oldu. Son vaxtlar komandada psixoloji gərginlik var idi. Amma toparlana bilmişdik. Komandamı təbrik edirəm. Azər Məmmədova və "Kəpəz"ə uğurlar arzulayıram”.

Baş məşqçi heyətdəki zədəliləri durumuna da toxunub: “Mateus Silva “Bayer”lə matça tam hazır olmayacaq. "23 -lük"də yer ala bilər. Amma Andrey Lunyovun hazır olma ehtimalı çoxdur. Sabahdan komanda ilə məşqlərə başlayacaq. Görək həkimlər nə deyəcək. Zədəlilərin çox olmasının səbəbi yoxdur. Sadəcə yüklənmələr çoxdur. Bəzi futbolçular buna dözür, bəziləri yox. Bu mövsüm ciddi zədə Marko Veşoviçdə olub. Abbas Hüseynov ötən mövsümdən zədəli idi. Digər zədəlilərimiz qaydasına düşür. Mateus da sabahdan komandaya qoşulacaq. Futbolun silinməyən qaydalarıdır. Zədələr ya hazırlıqsızlıqdan olur, ya da yüklənmədən. Birinciyə görə olsaydı, nmarahat olardım. Amma yüklənmələrdəndir. İşimizi daha da ehtiyatlı tutmalıyıq. Rotasiyalara fikir verməliyik. Bəzən risklərə də gedirik”.

Mütəxəssis UEFA Avropa Liqasının “Bayer”lə qarşıdakı görüşü barədə fikirlərini də bildirib: “Bu gün güc olaraq "Bayer" bizdən çox yuxarıdadır. Çempionat və heyəti, klub olaraq çox ciddi addımlar atıblar. Nəticəsini də görürlər. Dəfələrlə istəmişik ki, belə rəqiblərə qarşı yaxşı oynayaq. Bizim də buna şansımız var. Bakıda öz doğma stadionumuzda oradakı matçdan daha yaxşı oynamağa çalışacağıq. Bu cür komandalar istənilən matça nəticəni təmin etsələr də, tam ciddi yanaşırlar. Bizi ciddi oyun gözləyir. Çox istəyirik ki, bu rəqibə qarşı daha yaxşı oyun göstərək. Rəqib nə qədər buna imkan verəcək, bunu da nəzərə alacağıq. İnanıram ki, oradakı oyundan daha yaxşısını Bakıda göstərəcəyik”.

Qurban Qurbanov het-trik müəllifi olan Yassin Benzianı da təbrik edib: “Futbolçu nə qədər çox qol vursa, assist etsə, bu, ona inam verir, həvəsləndirir. Bura gələnə qədər paltardəyişmə otağında onun söhbəti oldu. Futbolçular dedi ki, Benzina karyerasında ilk dəfə het-trik etdi. Sevindirici haldır. Het-trik etməyin hansısa futbolçuya müsbət təsiri olur, kiməsə mənfi. Amma Benzia təcrübəlidir. Onun yaxşı formaya düşməsi üçün qolların faydası olacaq. Onu təbrik edirəm”.