Qurban Qurbanov: “Daha məsuliyyətli və diqqətli olmalıyıq”

Avropa Liqasının pley-off mərhələsinin ilk oyunları çərçivəsində keçirilən “Braqa” – “Qarabağ” matçından (2:4) sonra komandamızın baş məşqçisi Qurban Qurbanovun mətbuat konfransı keçirilib. Təcrübəli mütəxəssis qarşılaşma barədə fikirlərini açıqlayıb:

“Futbolçularımı təbrik edirəm. Həqiqətən çox ciddi rəqibə qarşı oyun oldu. “Braqa” sürətli hücumları və futbolçuları olan komandadır. Oyunçularımız çox yoruldular, çox əziyyət çəkdilər. Matçın 4:2 hesabı ilə bitməsinə baxmayaraq, bu, hələ ilk hissədir. Bu cür komandalar belə turnirlərdə istənilən nəticəni öz xeyirlərinə dəyişə bilərlər. Ona görə biz arxayınlaşmalı deyil, cavab oyununda daha ciddi olmalıyıq. Vaxtımız olacaq ki, bu matçı daha yaxşı təhlil edək. Qarşıdakı görüşdə daha məsuliyyətli olmalıyıq”.

Baş məşqçi favorit hesab edilən rəqibə 4 qol vurulması və cütün taleyi barədə də danışıb: “Proqnozlara fikir vermirəm. Real baxsaq, fikirlər düz idi. Həm reytinqə, həm komandanın çıxış etdiyi çempionata, avrokubok təcrübəsinə görə bunu normal qarşılayıram. Bizim xeyli təcrübəmiz var. İnanırdıq. Əlbəttə, dörd qol vuracağımızı düşünmürdük. Amma futbolçulardan tələbimiz odur ki, hər hücumda məsuliyyətli olsunlar və ələ düşən fürsətlərdən maksimum istifadə etsinlər. Bu gün oyun pis alınmadı, bizim tərəfimizdə oldu. Amma o demək deyil ki, cütün taleyi həll edilib. Bakıda oynayacağımızdan şansları 50-nin 50-yə dəyərləndirirəm. Çünki belə böyük turnirlərdə çox görmüşük ki, evdə uduzan komanda səfərdə daha rahat oynayıb və ya əksinə. Hamımız daha soyuqqanlı olmalı, matça düzgün yanaşmalıyıq. Cütün taleyi həll olub kimi fikrimiz olmamalıdır. Bu, futbolçulara da əks təsir göstərə bilər. Çünki qarşımızda çox keyfiyyətli oyunçulara malik “Braqa” var. Bakıda çalışacağıq ki, burdakından daha ciddi, daha diqqətli və səhvsiz oynayaq. Qarşılaşmanın taleyi cavab görüşündə həll ediləcək. Bakıda daha məsuliyyətli və diqqətli olmalıyıq”.

Qurbanov son matçlarda buraxılan qollara və Nəriman Axundzadənin son saniyələrdə qaçırdığı epizoda münasibət bildirib: “Son oyunlarda bu qədər qol buraxılmasını istəməzdim. Bunun üzərində çalışırıq. Bu gün standart vəziyyətlərdən iki top buraxdıq, biri penaltidən, digəri künc zərbəsindən sonra. Müdafiədə oynamağa daha ciddi yanaşmalıyıq. Nəriman Axundzadə ilə qaçırılan qol epizodu barədə danışmadım. Onu görmədim. Hətta oyunda da göz yaşlarını saxlaya bilmirdi. Bu, normaldır. Belə yanaşırsa, məsuliyyətdəndir və buna sevinirəm. Bəlkə də qolu vursaydı, daha gec böyüyəcəkdi, məncə vurmadığı üçün öz üzərində daha çox çalışacaq. O, perspektivli futbolçularımızdandır. Bizim tutduğumuz yol var. Rəqiblərə, hər komandaya real baxır, hörmətlə və ciddi yanaşırıq. Bu, o demək deyil ki, biz bacarıqsızıq. Bizim təcrübəmiz, inamımız var, futbolçular çox işgüzardırlar. Belə nəticələr bəzən alınır, bəzən alınmır. Meydana inamla çıxırıq”.