Qurban Qurbanov: “Futbolçularıma inanıram”

UEFA Avropa Liqasının qrup mərhələsinin VI turunun “Qarabağ” – “Hekken” oyunu öncəsi komandamızın baş məşqçisi Qurban Qurbanov və futbolçusu Marko Yankoviçin mətbuat konfransı keçirilib. Təcrübəli mütəxəssis sabah baş tutacaq qarşılaşma barədə fikirlərini açıqlayıb:

"Bu il Avropa Liqasında son oyunumuza çıxırıq. Bizim üçün çox vacib matçdır. Futbolçuların demək olar ki, oyuna tam hazırdırlar. Çox yaxşı hazırlıq keçiblər. Sadəcə rəqibin də qarşılaşmaya çox ciddi yanaşdığını görürük. Qrupu xalsız tərk etmək istəmirlər. Biz nəzərə almalıyıq ki, qarşımızda çox istəkli rəqib olacaq. İnanıram ki, həm psixoloji, həm taktiki cəhətdən futbolçularım oyuna tam hazır olacaqlar. Ən düzgün və ən ağıllı oyunlarını göstərməyə cəhd edəcəklər. Futbolçularıma inanıram. Matça qədər futbolçularımıza daha ətraflı məlumat verəcəyik”.

Qurban Qurbanov heyət barədə də danışıb: “Çox istəyərdim ki, bu oyunda hamı, o cümlədən də, Kevin Medina iştirak etsin. Qrupda ikinci yerdə olmaq şansımız varsa, futbolçuların hamısı bunu haqq edib. Əfsuslar olsun ki, Kevin Bakıda da olmayacaq. O, dünən əməliyyat edilib. Müdafiəçi ilə danışdım. Bakıda olmağı çox istəyirdi. Dedi ki, hiss edin yanınızdayam. Medina əsas oyunçularımızdan biridir. Lakin bu gün sırf oyun barədə düşünməliyik. Olan problemi necə aradan qaldırmaq haqda fikirləşməliyik. İnanıram ki, digər oyunçular bunu bacaracaqlar. Dəfələrlə görmüşük ki, 2-3 əsas oyunçumuz olmayıb, amma digərləri onları çox düzgün, çox bacarıqlı sığortalaya biliblər. Medinaya da tezliklə geriyə dönməyi arzulayırıq. Marko Veşoviçə gəlincə, normal durumdadır. Əgər hər şey qaydasında olsa, meydana çıxacaq”.

Qurban Qurbanov UEFA Avropa Liqasının pley-offuna çıxmaq şansına da toxunub: “İlk dəfə deyil ki, belə vəziyyətlə üzləşmişik. Bir neçə dəfə son matçda şanslarımız olub. Hətta son saniyələrdə nəticəni əldən vermişik. Bu gün də şansımız var. Futbolçularımla danışıram və istək çoxdur. Bütün azarkeşlərdə, sizdə, futbol ictimaiyyətində də həmçinin. Bunlar narahat olduğumu məqamlardır. Biz çox soyuqqanlı olmalıyıq. Səhvimizin az olmasına çalışmalıyıq. Rəqibə necə hazırlaşırıqsa, hansı hücumları qurmalıyıqsa, bunu düşünməliyik. Futbolçular bunu yerinə yetirməlidir. Şansımız var ki, bundan istifadə edək. Futbolçular sabah çalışmalıdır ki, ən təcrübəli və düzgün oyunlarını göstərməlidirlər. Bunu bacaracaqlarına əminəm”.

Marko Yankoviç də İsveç klubu ilə görüşdən gözləntilərini açıqlayıb: "Bizi sabah çox vacib oyun gözləyir. Bu matça tam hazırıq. Rəqibi də analiz etmişik. Əlimizdən gələni edəcəyik ki, oyunu və qrupu yaxşı nəticə ilə bitirək.  İnanmıram ki, yağış kiməsə problem yaratsın. Hamı sabah bacarığını göstərmək istəyir. Biz sabah qalib gəlməli və pley-off mərhələsinə vəsiqə qazanmalıyıq. Bundan sonra növbəti rəqib haqda danışa bilərik. Komanda düzgün hazırlıq keçsə, motivasiya olsa, elə keyfiyyətdəyik ki, hər rəqibə qarşı oynaya bilərik”.