Qurban Qurbanov: “Mübariz oyun göstərmək istəyirik”

UEFA Avropa Liqasının qrup mərhələsinin IV turunun sabah keçiriləcək “Qarabağ” - “Bayer” oyunundan öncə baş məşqçimiz Qurban Qurbanov və futbolçumuz Bəhlul Mustafazadənin iştirakı ilə mətbuat konfransı baş tutub. Təcrübəli mütəxəssis Tofiq Bəhramov adına Respublika stadionundakı qarşılaşma barədə fikirlərini bildirib:

“Çox ciddi komandaya qarşı oynayacağıq. “Bayer” hazırda Avropanın ən dinamik komandalarından biridir. Çox yaxşı oyun fəlsəfələri və bunu düzgün icra edən futbolçuları var. Rəqiblə tam tanış olduq, futbolçulara lazım olduğu qədər izah etdik. Doğma azarkeşlərimiz önündə mübariz oyun göstərmək istəyirik. Oyunçularımızın bunu bacaracaqlarına şübhə etmirəm”.

Baş məşqçi yer aldığımız qrupda hər bir komandanın qrupdan çıxmaq şansının olduğunu qeyd edib:

“Biz həmişə öz oyunumuzu yaxşılaşdırmağı düşünmüşük. Əvvəlcə rəqibin oyununu pozmağa, sonra öz oyunumuzu göstərməyə çalışırıq. Hər bir komandanın optimal formada olub-olmadığı vaxtlar olur. “Bayer”i nəzərə almasaq, digər üç komandanın hər biri mərhələ adlamaq imkanına malikdir. Bizim də şansımız varsa, vəziyyəti düzgün təhlil edib, daha yaxşı nəticələr qazanmağa çalışacağıq”.
Mustafazadə də qarşılaşma barədə fikirlərini açıqlayıb: “Sabah bizi maraqlı oyun gözləyir. Rəqibin gücündən danışmağa ehtiyac görmürəm. Əsas bizim onlara qarşı necə reaksiya göstərməyimizdir. Komanda olaraq əlimizdən gələni edəcəyik. Almaniya klubları taktiki savadları və intizamları ilə seçiliblər. Belə rəqiblərə qarşı daha kompakt oynayaraq nəticə qazanmaq olar”.