Qurban Qurbanov: “Onların sevinci bizə daha böyük ruh verir”

UEFA Avropa Liqasının qrup mərhələsinin I turunun “Qarabağ” – “Molde” (Norveç) oyunundan (1:0) sonra komandamızın baş məşqçisi Qurban Qurbanovun mətbuat konfransı keçirilib. 51 yaşlı mütəxəssis qarşılaşma haqda fikirlərini açıqlayıb:

“Xalqımızı dünənki böyük qalibiyyət münasibətilə təbrik etmək istəyirəm. 30 ildən çox belə gərginlikdən sonra 44 günlük müharibədə böyük zəfər olmuşdu. Azərbaycan xalqını, Cənab Prezidentimizi təbrik edirəm. Şəhidlərimizə Allah rəhmət eləsin. Bu gün çox istəyirdik ki, qalib gələk. Futbolçular çox istəkli idilər. Özümüzü səbirli, təmkinli, meydanda intizamlı aparmalı idik. Futbolçularıma oyun intizamına görə təşəkkür edirəm. Vacib qalibiyyət əldə etdik. Çox maraqlı, yaxşı oyun oldu, sonadək temp düşmədi. Möhtəşəm azarkeşlərimiz bizdən qələbə gözləyirdilər. Onların sevinci bizə daha böyük ruh verir. Çalışacağıq ki, qarşıdakı matçlara hazırlaşaq. Redon Cica son məşqdə zədələndiyi üçün adı “23-lüy”ə daxil edilməmişdi. Marko Veşoviç fərdi qaydada məşq edir, hələ komandaya qoşulmayıb. Meydana qayıtması üçün bəlkə də bir ay vaxt lazım olacaq. Vacib olan 3 xal idi. Qalib gəlmək üçün hazırlaşmışdıq”.