Qurban Qurbanov: “Uzun illər gözlənilən bir uğur əldə olundu”

UEFA Avropa Liqasının qrup mərhələsinin VI turunun “Qarabağ” – “Hekken” oyunundan (2:1) sonra komandamızın baş məşqçisi Qurban Qurbanovun mətbuat konfransı keçirilib. Təcrübəli mütəxəssis qarşılaşma haqda fikirlərini açıqlayıb:

"Futbolçularımı təbrik edirəm. Onlara təşəkkürümü bildirirəm. Azarkeşlərimizi təbrik edirəm. Neçə illərdir ki, belə şansımız olmuşdu, bundan istifadə edə bilməmişdik. Hətta son saniyələrdə belə bir uğur əldə edə bilərdik, əlimizdən qaçmışdı. Bu gün hər şey gözəl sonluqla başa çatdı. Uzun illər gözlənilən bir uğur əldə olundu. Bunu təkcə biz yox, bütün azarkeşlərimiz, bütün xalqımız gözləyirdi. Onlara görə çox sevinirəm. İnanıram ki, belə bir uğuru əldə etmək həm futbolumuza böyük təkan, həm futbolçularımıza, həm də özümüzə inam verəcək. Böyük, yaxşı komandaların Bakıya gəlməsi, belə turnirlərdə, bəzi oyunlarda nəticə üçün oynamaq ancaq Azərbaycan futboluna fayda verə bilər. Buna görə şadam. Sizə də təşəkkür edirəm, təbrik edirəm. Gərgin oyunlarda daim bizimlə oldunuz".

Baş məşqçi UEFA Avropa Liqasının pley-offuna vəsiqə qazanılması barədə də danışıb: “Bəzən bizim kimi komandalar üçün belə şanslar çox nadir hallarda olur. O şansı itirəndə, komandaya, rəhbərliyə, kollektivə çox böyük təsir edir. Həmin anı gözləyirsən ki, bir daha nə vaxt belə şans olacaq. Belə şans dəfələrlə oldu. Amma bu gün hər şey çox yaxşı bitdi. Bəlkə də bunun ləzzəti daha yaxşı olacaq. İllər boyu nəticəni gözləyəndə, əziyyətin yerdə qalmayanda, sonadək mübarizə aparıb uğur əldə edəndə, ola bilər ki, daha davammiyətli olsun. Kluba, futbolçularımıza daha çox fayda versin”.

Qurban Qurbanov növbəti mərhələdəki mümkün rəqiblərə də toxunub: “Hər biri Çempionlar Liqasında oynayası komandalardır. Hətta o klubların içərisində Çempionlar Liqasının qalibi olmağı qarşısına məqsəd qoyanlar da var idi. Hamısı ciddi rəqibdir. Hansı haqda düşünmüşəm desəm, bir az doğru olmaz. Hansı rəqib olacağını püşkatmada görəcəyik. Çox istərdik ki, həmin matçlara çox ciddi hazırlaşaq və layiqli oyun göstərək. Məncə, təcrübə böyük rol oynayacaq. Bu gün futbolçularımın təcrübəsi az deyil. "Bayer"lə oyun bizə futbolda çox şey verdi. Biz o səviyyədə olan komandaların gücünü hiss etdik. Hansı rəqib olursa-olsun, ola bilər ki, daha çox analiz edək. Yanvardan  çempionatımız başlayacaq. Ola bilər ki, hazırlığımızda da bəzi dəyişikliklər edək ki, o vaxt komanda pik nöqtəyə çıxsln. Rəqibdən çox şey asılıdır. Elə olur ki, nə qədər hazır olsaq da, rəqib bizi üstələyir. Bu il bəzi oyunlarımız oldu ki, böyük matçlarda daha yaxşı oynamaq üçün fürsət əldə etdik”.

Baş məşqçi azlıqda qalan komandanın daha çox müdafiə olunmasını rəqiblə əlaqələndirib: “Baxmayaraq ki, müdafiədə olduq, çox yaxşı əks-hücumlarımız oldu. Rəqib bizi buna  məcbur etdi. Bəzən belə oyunlarda, belə halların olması məni sevindirir. Son vaxtlarda futbolçularda elə fikirlər oyanıb ki, biz daha çox hücumda olmalıyıq. Amma tələblərimizdən biri odur ki, hücumda ola-ola müdafiə olunaq. Bu səviyyədə oyunlarda, azlıqda qalanda, futbolçu düzgün müdafiə olunmağı bacarırsa, bu böyük futbolun vacib hissələrindəndir. Qarşımızda elə rəqib yoxdur ki, 90 dəqiqə hücumda olaq. Nəticə üçün çox önəmli amillərdən biridir. Amma futbolçularım bunu bacardılar”.