Rəşad Sadıqov danışdı...

Hər zaman transfer siyasətinə həssas yanaşan komandamız mövsümlərarası fasilədə heç şübhəsiz ən böyük transferi reallaşdırdı. Azərbaycan millisinin kapitanı Rəşad Sadıqov `Qarabağ`ımızla müqavilə bağladı. Azərbaycanımızın ən məşhur futbolçusu Avroliqada sərgilədiyi başarılı futbolla `Qarabağ`a töhfəsini vermişdi. 27 yaşlı müdafiəçi hal-hazırda zədəsini sağaltmaqla məşğuldur. Bəs, görəsən Sadıqov millinin qarşıdan gələn oyunları və premyerliqa haqqında nə düşünür:` Hal-hazırda zədəmi sağaltmaqla məşğulam. Tezliklə, yaşıl sahələrə dönməyi gözləyirəm. `Tvente`ylə oyunlarda kənarda qalmağıma görə üzüldüm. Amma artıq irəli baxmalıyıq. Millidə olmasam da, inanıram ki, yığma uğur qazanacaq. O ki, qaldı çempionata. Bu il gərgin yarış olacaq. `Bakı`, `Neftçi`, `İnter`, `Xəzər-Lənkəran` bahalı transferlər reallaşdırıblar. Heyətləri yetərincə güclüdür. Hər halda çempionluğa ən real namizəddilər. Təbii ki, `Qarabağ` onlara layiqli müqavimət göstərməyə çalışacaq. Bizim gənc amma perspektivli heyətimiz var. `Qarabağ` Azərbaycan futbolunun sabahıdır. Avroliqidakı çıxışdan sonra özünəinam artıb. İnşallah, bu özünəinam çempionatın sonuna qədər davam edər`