Romalla Asen "Qarabağ"a keçə bilər(FUTBOL+, 17.01.2006)

"Qarabağ" Zaqulbada təlim-məşq toplanışını davam etdirir. Bu gün Ağdam klubu düşərgəsindəki bir neçə əcnəbi futbolçunu sınaqdan keçirmək üçün "Bakı"yla yoxlama oyunu keçirəcək. Xatırladaq ki, Böyükağa Ağayev hələ bir neçə gün öncə İqor Lısak, Valeri Sviryov, Dəmir Əbdürrəhmanov və Roman Udodovu komandasının ikitərəfli oyununda sınamışdı. Ancaq həm onları, həm də yeni gələn digər futbolçuları iş başında görmək üçün bugünkü matç az əhəmiyəət daşımır. Gürcüstan millisinin müdafiəçisi Mamuka Seretelinin ilk sınağı olacaq qarşılaşmadan sonra bir sıra suallara aydınlıq gələcəyi gözlənilir. Belə ki, həm əvvəl gələnlərin, həm Seretelinin, həm də adını öyrənə bilmədiyiz digər gürcünün qalıb-qalmayacağı bu gün dəqiqləşməlidi. Artıq "Qarabağ"a gələcəyi gözlənilən yerli oyunçuların da adı hallanmağa başlayıb. Belə ki, "Turan"dan ayrılan Romal Hüseynovun karyerasını Ağdam klubunda davam etdirəcəyi ehtimalı böyükdü. Dünən futbolçuyla söhbətdə dəqiqləşdirdik ki, həm "Qarabağ", həm də digər komandalarla danışıqlar hələ davam edir və məsələyə bugünlərədə aydınlıq gələcək. Eyni zamanda onun komanda yoldaşı Asen Nikolovun da eyni marşrutla hərəkət edəcəyi gözlənilir. Bu arada etibarlı mənbədən aldığımız bilgiyə görə, Ağdam klubu tovuzluların sıralarını tərk etmək istəyində olan digər futbulçu - Elnur Abbasovun xidmətində maraqlıdı. Həmçinin "Karvan"ın üzvü Cəmşid Məhərrəmovun da icarə əsasında ikinci dövrədə ağdamlıların heyətində çıxış edəcəyi gözlənilir.