Şamaxıda qələbə

“Şamaxı” - “Qarabağ” - 0:1

Musa Qurbanlı, 90+4

“Qarabağ” növbəti oyununu keçirib. Komandamız Misli Premyer Liqasının III turundan təxirə salınan matçında “Şamaxı”nın qonağı olub. Qarşılaşma Şamaxı şəhər stadionunda baş tutub.

Qurban Qurbanov bu matçda aşağıdakı start heyətinə şans verib: 1. Şahrudin Məhəmmədəliyev, 20. Riçard Almeyda (k), 30. Abbas Hüseynov, 44. Elvin Cəfərquliyev, 10. Abdullah Zubir, 8. Marko Yankoviç, 2. Mateus Silva, 6. Julio Romao, 19. Redon Cica, 15. Leandro Andrade, 21. Aleksey Kaşuk.

Oyun komandamızın üstünlüyü ilə başlayıb. İlk dəqiqələrdən nəzarəti ələ alan futbolçularımız meydanın rəqibə aid hissəsində paslaşaraq, boşluq axtarırdılar. Komanda şəklində müdafiə olunan meydan sahibləri sürətli əks-hücumlara bel bağlayırdı. Ancaq rəqibin bu həmlələri müdafiəçilərimizin etibarlı çıxışı sayəsində vaxtında dəf edilirdi. Nəticədə fasiləyə qədər hər iki komanda fərqlənə bilməyib.

İkinci hissə daha baxımlı alınıb. Oyunun tempi artdıqca komandalar təhlükəli hücumlar qurmağa müvəffəq olurdular. Hissənin ortalarında hər iki komandanın ifasında qol vəziyyətləri yaransa da, qapıçılar hesabın açılmasına imkan vermirdilər. Matçın sonlarında təşəbbüsü tam ələ alan komandamız əlavə olunmuş 4-cü dəqiqədə qələbə qolunu vurub. Musa Qurbanlının qolu komandamıza 3 xal gətirib.

Beləliklə, “Qarabağ” səfər oyununda 1:0 hesabı ilə qalib gəlib. Bu qələbədən sonra xallarının sayını 44-ə çatdıran komandamız turnir cədvəlinin zirvəsindəki mövqeyini möhkəmlədib.

Qeyd edək ki, “Qarabağ” növbəti görüşünü dekabrın 22-də keçirəcək. XVIII tur matçında rəqib “Araz-Naxçıvan” olacaq. Qarşılaşma Tofiq Bəhramov adına Respublika Stadionunda reallaşacaq.