ŞEVÇENKO "FƏNƏRBAĞÇA"DA???

 Dörələrarası fasilədə heyətinə cəmi bir futbolçu – Çilidən olan Maldonadonu qatan “Fənərbağça” gələcəkdə yeni ulduz oyunçuların transferini davam etdirməyi düşünür. İndi də İstanbul klubunun prezidenti Aziz Yıldırım ukraynalı Andrey Şevçenkonu almaq niyyətindədir. Bu yaxınlarda dostları ilə ziyafətdə olan “Fənər”in prezidenti deyib ki, elə bir oyunçu ilə razılığa gəlmişəm ki, Türkiyəyə gələndə hamı məəttəl qalacaq. Əslində çoxlarının ağlına ilk olaraq Ronaldonun adı gəlir. Ancaq braziliyalının “Milan”da qalacağını söyləməsi vəziyyəti bir qədər dəyişib. Üstəlik futbolçunun zədəli olması “Fənərbağça”nın da ondan imtina etməsinə səbəb olub. Namizədlər arasında Rud van Nesterloy və Andrey Şevçenkonun adları ön plana çıxır. Hollandiyalının “Real”da işlərinin yaxşı getməsini nəzərə alsaq, o zaman Şevçenko variantı daha real görünür. Çünki ukraynalı “Çelsi”də hələ də istədiyi oyunu göstərə bilmir və Türkiyəyə gəlməsi onun karyerasında yeni dövrün başlanğıcı hesab oluna bilər.