Sissoko kimin olacaq? ( FUTBOL+, 12.07.2005)

UEFA kubokuna hazırlığı davam etdirən "Bakı" bu gün Quba toplanışını başa vurub paytaxta dönəcək. Komandanın qapıçısı Xalidu Sissoko güman ki, daha Əsgər Abdullayevə lazım olmayacaq. Belə ki, seneqallının "Karat"a keçidi real görünür. Yeri gəlmişkən, "Karat" sabahdan etibarən Sumqayıtdakı "Dalğa" mehmanxanasında ikihəftəlik təlim-məşq toplanışına yığışacaq. Amma Sissokonun "Qarabağ"da görünmək ehtimalı da var. Belə ki, əməli işə keçən ağdamlılar "Bakı"ya verdiyi Emin İmaməliyevin əvəzinə seneqallını heyətə cəlb etmək istəyir. Dünən aldığımız bilgiyə görə, Xalidu heç də "Qarabağ"ın yeganə transferi olmayacaq. Belə ki, Elxan Abdullayevin baş məşqçi postuna təyinatından sonra müqaviləsi bitməyən bir çox oyunçuların komandaya qaytarılması məsələsi gündəmə gəlib. Etibarlı mənbədən aldığımız bilgiyə görə, Vadim Vasilyev və Rauf Mehdiyev istisna olmaqla, ötən mövsüm "Qarabağ"da çıxış etmiş bütün futbolçular geri qaytarılacaq. Hazırda "Turan"ın düşərgəsində olan Samir Musayev, "Xəzər-Lənkəran"ın heyətinə qatdığı Vüqar Nadirov, eləcə də "Karvan"da hazırlığı davam etdirən Aslan Kərimov da daxil olmaqla bütün oyunçular Ağdam klubuna gəlməlidi. Onları İqor Getman, Eltay Aslanov kimi bir sıra təcrübəli oyunçuların müşaiyət edəcəyi də söylənilir.