Tahir Gözel:`Qarabağ`ın tək hədəfi Avropadır!`

`Qarabağ`ımız sabah premyerliqanın son matçına çıxacaq. Avrokubokların taleyini həll edəcək  mücadilə mövsümün ən vacib oyunu durumuna gəlib. Daim `Qarabağ`ımızın yanında olan klubumuzun vitse-prezidenti Tahir Gözel yenə də ənənəsinə sadiq qalıb. Tahir bəy `Azersun Holding` rəhbərlərindən Fevzihan Arasla birgə komandaya vacib oyunöncəsi dəstək vermək üçün hər kəsi bir araya toplayıb. Öncə başqan Şuşanın ermənilər tərəfindən işğal olunması haqqında danışdı. Həyatda insan olmanın daha vacib ünsür olduğunu qabardan başqanımız futbolçularımıza sosial və ictimai məsuliyyətlərini dərk etmələrinin mühimliyini anlatdı. Ardınca `planetarium`da kainat haqqında film izlənildi. Maarrifləndirici xarakter daşıyan  göstəridə kainat və insan müqayisəsi Tahir bəyin özünəməxsus açıqlamalarıyla rənglənirdi.
Tahir bəy komandaya inandığını və `Xəzər-Lənkəran`la oyunda onlardan ancaq xoş xəbər gözlədiyini ifadə etdi. Səmimi mühitdə keçən görüşdə Tahir bəy suallarımızı da cavablandırdı:
- Tahir bəy, hər zaman komandayla birgə olanda nəinki idman daha çox ümumibəşər məsələlərə toxunmaqla yadda qalırsız.
- `Qarabağ`  bizim üçün sadəcə futbol komandası deyil. İnsanlaşmanın, günü-gündən qloballaşan dünyamızda məsuliyyətimizin daha da artdığı məqamda insan faktorunun qiyməti hər an çoxalır. Biz bir ailə olaraq bir-birimizə daha çox bağlıyıq. Bir-birimizi sevdiyimizə görə içimizdəki gözəllikləri üzə çıxarmağa çalışırıq. Bugünki toplantımızda bu məqsədə xidmət edir.
- Hər halda klub başqanının futbolçularını `planetarium`a gətirilməsi xoş bir təəccübə səbəb oldu.
- Futbol komandası daim bir futbol stressinin içində olur. Burda məqsədimiz komandanı bir kosmos səyahətinə çıxarıb onları bu stressdən uzaqlaşdırıb vacib oyunöncəsi rahatlaşdırmaqdır. Bakımızda belə möhtəşəm `planetarium` varsa ondan faydalanmaq lazımdı. Belə vacib oyunöncəsi komandamızın yanında olmalıyıq. Zənnimcə, bu bizə faydalı oldu. Komandanın stressdən qurtulmasını görmək xoş idi.
- Adətən klub rəhbərləri komandalarını ancaq xoş gündə xatırlayırlar. Amma siz çətin məqamlarda komandaya sahib çıxmağı xoşlayırsız.
- Bir komandanın yaxşı və pis günü olmur. Bu mübarizədir. Heç bitməyən mübarizə. Əgər amalımız uğrunda sona qədər vuruşacağıqsa daim bir olmalıyıq. Komanda daim öz birliyini hiss etməlidi. `Qarabağ`ın bir fəlsəfəsi var:`Əvvəl mənəviyyat, ardınca birlik-bərabərlik. Bunu heç kimsə dağıda bilməz. Heç bir güc, heç bir məğlubiyyət, heç bir itki bizim ruhumuza təsir göstərə bilməz. Eyniylə, uğur qazandığımızda belə öz yolumuzu gedəcəyik. Məğlubiyyət də bizim üçün dünyanın sonu deyil. Bir də ki, meydan düz, top yumrudur. Burda hər saniyənin öz hökmü var. Ən ümidsiz məqamda belə ümid işığı yana bilər. Mən istəyirəm ki, `Qarabağ` daim təslim olmayan, sona qədər mübarizə aparma fəlsəfəsini özünə aşılasın. Bu bizim mütləq həqiqətimizdir. Mənə görə `Qarabağ`ın anlamı budur. Bu bizim mesajımızdır bütün dünyada:`Biz təslim olmayacağıq, biz axıra kimi vuruşacağıq.` Bizim 1 milyondan çox məcburi köçkünümüz var. Bu mübarizə, təslim olmama ruhu bizim duruşumuza və futbolumuza da yansımalıdır.
- Tahir bəy, hər zaman vacib matçlardan öncə fərqli motivasiya üsüllarından yararlanırsız. Bu dəfə nə düşünmüsüz?
- `Qarabağ` Avrokuboklarda Azərbaycanın ən uğurlu təmsilçisidir. Bu həmin komandadır ki, 3 il bütün məmləkətə sevinc bəxş edir. Mən hər zaman futbolçularıma deyirəm ki, `Qarabağ` qadirdir. `Qarabağ` üçün mümkünsüz heç nə yoxdur. Son illər stabilliyimiz göz önündədi. Mən komandama, azarkeşimə inanıram. İnanıram ki, biz adımızın böyüklüyünü bir daha göstərəcəyik. `Qarabağ`ın adı avropada hallanmalıdır. Bu bizim borcumuz, məqsədimizdir. Ona gərə də tək hədəfimiz var:Avropa!
- `Qarabağ`ı ən çətin məqamda qəbul etmisiz. Azərbaycanda ən uzun müddətə çalışan klub rəhbərisiz. İlk gündən bugünə nələr dəyişib?
- Mən bu misalı xatırlamağı çox xoşlayıram. Mən heç vaxt unuda bilmirəm ki, Londonda taksiyə minəndə  sürücü məndən haralı olduğumu soruşdu. Dedim ki, Azərbaycanlıyam. Deyəndə fikirləşdim ki, yəqin neft ölkəsi olduğumuza görə bizi tanıdı. Dedim neftimizə görə tanıyırsan? Dedi ki, yox! Onun `Qarabağ`ın `Rusenborq`u udduğunu görə Azərbaycanı tanıdığını deyəndə mənim hansı hallar keçirdiyimi təsəvvür edə bilməzsiniz. Bu bizim qələbəmiz idi. Dünyaca məşhur Stiv Maklarenin `Siz, `Qarabağ`la fəxr etməlisiz` deməsi bizim üçün ən böyük hədiyyədir. Demək, neçə illər çəkdiyimiz əziyyət boşa getməyib. `Qarabağ` Azərbaycanı beynəlxalq aləmdə tanınmasında az iş görmədi. Təbii ki, bu bizim üçün son deyil. Bu il də Avrokuboklara vəsiqə qazanıb uğurla çıxış etmək ən böyük hədəfimizdir.
- Belə vacib oyunöncəsi hər kəs başqan sözü gözləyir.
- Mən tərəfdarlardan möhtəşəm dəstək gözləyirəm. Stadionda olan və olmayanlar, ürəyi `Qarabağ`la döyünən hər bir insan duasıyla `Qarabağ`ın yanında olmalıdır. İnanıram ki, Lənkəranda azarkeşlərimiz bütünlüyümüzün nəticəsi olaraq `Qarabağ`ın zəfərini qeyd edəcəklər.